Захирлын мэндчилгээ

Манай сургуулийн вэб хуудсаар аялан зочилж байгаа эрхэм танд чин сэтгэлийн мэндчилгээ дэвшүүлье. Тус сургуулийн өнөөгийн сурагч, багш, ажилтан, эцэг эх болон төгсөгч, ахмад багш, ажилтан, суралцаж, ажиллаж байсан та бүхнээрээ сургууль тань ямагт бахархаж байдгийг хамт олныхоо өмнөөс уламжилъя. Манай сургуультай хамтран ажилладаг, ажил төрлийн холбоотой хүмүүс, биднийг мэддэг, шинээр мэдэж танилцахыг хүсэж байгаа хүн бүхэнд баярлаж байгаагаа илэрхийлэхийн ялдамд Таны хүсэн хүлээж буй мэдээ, мэдээлэлийг вэб хуудаснаа байршуулахын төлөө хичээн ажиллах болно гэдгээ мэдээлэл хариуцагч багш, сурагчдынхаа өмнөөс илэрхийлье. Цовоо сэргэлэн, хөгжилтэй шуугиантай, гэнэн цайлган бас хурц оюун билэгт олон зуун хүүхдийн хөгжөөнт амьдрал буцалж байдаг, арвин баялаг түүхтэй, амжилт ололт ихтэй эрдмийн гэгээн өргөөний нэг бол манай сургууль билээ. Манай хамт олон сургуулийнхаа үйл ажиллагааг олон чиглэлээр улам боловсронгуй болгож, өөрийн эх орныхоо төдийгүй дэлхийн өндөр хөгжилтэй улс орнуудын ижил төвшний сургуулиудын амжилтын жишигт хүрэхийн төлөө хичээн ажиллацгааж байна. Шинэ зууны хүмүүсийн хамгийн эрхэм нандин зүйл болох хүнлэг энэрэнгүй үзлийг өөртөө шингээсэн хойч залуу үеэ бэлтгэх, тэдэнд мөнхийн баяр баясгалан бэлэглэж байх нь манай эрхэм зорилго гэж үздэг. Манай вэбийн хүндэт зочин таныг бид нартай хамтран ажиллаж, бидэнд туслагч, бидний дотно зөвлөгч байж, дахин дахин зочилж байгаарай гэж хүсэж байна. Таны энэ өдрийн, маргаашийн, бүр алс хэтийн зорилго, мөрөөдөл тань сэтгэлчлэн бүтэх болтугай гэж ерөөе. Сайн үйлс бүхэн дэлгэрэх болтугай. ЗАХИРАЛ Б.Цолмонхүү

 

Posted in: